الأرز بالمكسرات

أنا شوفت الطريقة فى مجلة وعجبتنى أوى عملته انهاردة بس لسة ما دوقتش

عملت نص الكمية كتجربة

الخلطة :

1\2 كوب لوز
1\2 كوب بندق
1\4 كوب زبيب
3\4 كوب عين جمل
معلقة كبيرة سمن
نسلق اللوز 10 دقايق علشان نعرف نقشره بسهولة
البندق نحمصه على النار وده برضو لسهوله التقشير
نحط السمن ونحمر فيه اللوز والبندق ونشيلهم على جنب
وبعدين اضيف باقى المكسرالت عليهم

الأرز

2 كوب أرز
معلقة سمن
3 كوب ماء
2 معلقة كبيرة سكر
نص معلقة ملح

الطريقة

نغسل الرز ونصفيه ثم نحمر السمن ونضيف الرز بعد تصفيته كويس جدا ونفضل نقلب حوالى ربع ساعة لحد ما الرز يبقى لونه بنى هيلزق شوية فى الأول مفيش مشكلة استمروا فى التقليب ولما يبقى لونه بنى نفضيه فى طبق ونسيبه ونحط فى الحلة معلقتين السكر لحد ما يسيح ويبقى بنى نضيف الميا والملح ولما تغلى نضيف الرز ونوطى النار
لما يستوى نحط نص كمية المكسرات ونقلب ونقدمه فى سرفيس وعلى الوش باقى المكسرات وبالهنا والشفا
انا زودت معلقة صغيرة قرفة

تسلم ايديكي ياجوجو
فعلاا الارز بالمكسرات بيبقي جميل اوي
الطريقة ديه شبيهة من طريقتي في عمل الرز الملكي بالكسرات والزبيب والصنوبر
الف هنا يارب علي قلوبكم

تسلمى يا مونى هو طلع جميل جدا والله

ايون يا جوجو عرفته حماتى وبنتها بيعملوه حلو اوى
تسلم ايدك يا مبدعه

تسلميلى يا نوشا

فعلا الرز دا بيبقى جميل بس جربى تضيفى زبيب مع المكسرات
ويا سلام لو فى طاسة تانية شوية كبد وقوانص وبصل وتشوحيهم لحد ما يستوووو
وقلبيهم مع الرز زى المكسرات وسيبى شوية على الوش
بجد يمييييييييييييي

هى فعلا فيها زبيب بس انا ماحطيتوش علشان بيبقى مسكر اوى وبحس انى هرجع